பறிக்கப்படும் மானம் கிழிக்கப்படும் முகம்

 

பறிக்கப்படும் மானம் கிழிக்கப்படும் முகம்

புறம் எவ்வளவு பாரதூரமான விளைவை ஏற்படுத்தும் என்பதை அறியாமல் ஏதோ நேரப்போக்கிற்காக பேசிக்கொள்கிறோம். ஆனால் புறம் பேசுவதின் மூலம் ஒருவரின் மானம் விஷயத்தில் விளையாடுகின்றோம் அவரை தேவையில்லாமல் அவமானப் படுத்துகின்றோம் என்பதை வசதியாக மறந்து விடுகிறோம் மற்றவர்களின் மானத்தை புறம் பேசி பறித்தவர்களின் கதியை நபிகள் நாயகம் (ஸல்) அவர்கள் பின்வருமாறு கூறுகின்றார்கள். 

நான் மிஃராஜிக்கு கொண்டு செல்லப்பட்ட போது ஒரு கூட்டத்தார்களை கடந்து சென்றேன். அவர்களுக்கு செம்பு உலோகத்தினாலான நகங்கள் இருந்தன. அதன் மூலம் தங்கள் முகங்களையும் உடம்பையும் கீறிக்கொண்டிருந்தார்கள். இவர்கள் யார் என்று ஜிப்ரீல் அவர்களிடம் வினவினேன். இவர்கள் தான் புறம் பேசுவதின் மூலம் மக்களின் இறைச்சியை சாப்பிட்டுக் கொண்டிருந்தார்கள். இன்னும் மக்களின் மானங்களில் விளையாடிக் கொண்டிருந்தார்கள் என்று கூறினார். 

அறிவிப்பவர் : அளஸ் (ரலி)

நூல் : ஆபூதாவூத்-4235

நாம் சாதரணமாய் கருதுகின்ற புறம் பேசுதல் என்ற தீமை அதன் விளைவுகள் இவ்வுலகோடு நின்று விடாது. நமது மறுமை வாழ்க்கையையும் நாசப்படுத்துகின்றது. மறுமையில் தண்டனையை பெற்றுத்தருவதோடு நிறுத்திக் கொள்கின்றதா? இல்லையில்லை அதற்கு முன் மண்ணறையிலும் வேதைனையை பெற்றுத்தருகின்றது பல கடுமையான தண்டனைகளை புறம் பேசுதல் ஏற்படுத்துகின்றது என்பதை ஒவ்வொரு முஸ்லிமான ஆண்களும் பெண்களும் எண்ணிப்பார்க்க வேண்டும். 

இப்னு அப்பாஸ் (ரலி) அவர்கள் கூறியதாவது:

நபி (ஸல்) அவர்கள் மதீனாவிலுள்ள ஒரு தோட்டத்தைக் கடந்து சென்றார்கள் அப்போது சவக் குழிகளுக்குள் வேதனை செய்யப்பட்டுக் கொண்டிருந்த இரு மனிதர்களுடைய ஒலத்தைச் செவியுற்றர்கள். அப்போது இவர்கள் இருவரும் வேதனை செய்யப்படுகிறார்கள் ஒரு பெரிய (பாவச்) செயலுக்காக இவர்கள் இருவரும் வேதனை செய்யப்படவில்லை என்று சொல்லிவிட்டு ஆம்!

(ஒரு வகையில் இறைவனிடம் அது பெரிய பாவச் செயல்தான்) இவ்விருவரில் ஒருவரோ தம் சிறுநீரிலிருந்து (தமது உடலையும் உடையையும் மறைக்காமலிருந்தார். மற்றொருவரோ. (புறம் பேசி) கோள் சொல்லிலித் திரிந்துகொண்டிருந்தார் என்று கூறிவிட்டு ஒரு (பச்சை) பேரீச்ச மட்டையைக் கொண்டு வரச்சொல்லி அதை இரண்டாகப் பிளந்து ஒவ்வொரு சவக்குழியின் மீதும் ஒரு துண்டை வைத்தார்கள் அது பற்றி நபி (ஸல்) அவர்களிடம் நீங்கள் ஏன் இவ்வாறு செய்தீர்கள்? என்று கேட்கப்பட்டது. அதற்கு நபி (ஸல்) அவர்கள் இவ்விரு மட்டைகளும் காயாத வரை இவ்விருவரின் வேதனை குறைக்கப்படலாம் என்று பதிலளித்தார்கள்

நூல் : புகாரி-26

புறம் பேசுவதை தவிர்க்க ஒரு நல்வழி

பிறர் குறையை மக்கள் மத்தியில் வெளிப்படுத்துவதே புறம் என்று பார்த்தோம். இதனால் கிடைக்கும் தண்டணைகளை நாம் எண்ணிப்பார்த்தாலே இதிலிருந்து விலகிவிடுவோம் என்றாலும் இன்னுமொரு வழியையும் நாம் கடைப்பிடிக்கலாம். பிறரைப்பற்றி ஒரு குறை நமக்கு தெரியவருமாயின் அதை மறைத்து விடவேண்டும். அவ்வாறு மறைத்தால் நமது குறைகளை இறைவன் மறுமையில் மறைத்து விடுகின்றான்

நபி (ஸல்) அவர்கள் கூறினார்கள்:

ஓர் அடியார் மற்றோர் அடியாரின் குறையை இவ்வுலகில் மறைத்தால் அவருளடைய குறையை அல்லாஹ் மறுமை நாளில் மறைக்காமல் இருப்பதில்லை.

அறிவிப்பவர்: ஆஹுரா (ரலி)

நூல் : முஸ்லிம்-504

நமது குறைகள் தவறுகள் மறைக்கப்பட வேண்டிய முக்கிய தருணம் மறுமை நாள் தான். இவ்வுலகில் அவைகள் வெளிப்படுத்தப்பட்டால் அதனால் பெரிய விளைவுகள் ஏதும் ஏற்பட போவதில்லை. ஆனால் மறுமை நாளில் நமது குறைகள் வெளிப்படுத்தப்பட்டால் அதை விட வேறு கேவலம் கிடையாது எனவே மறுமையில் நாம் அசிங்கப்படுவதை அவமானப்படுவ தவிர்க்க புறம் பேசுவதை தவிர்த்தே ஆக வேண்டும் என்பாத மனதில் நீக்கமற பதியுங்கள். புறம் என்ற தீய குணம் உங்களை விட்டும் விரண்டோடுவதை நீங்களே உணர்வீர்கள்.

மலிவாகி போன மான விளையாட்டு

ஒவ்வொரு முஸ்லிமுக்கும் பிறர் உயிரை எடுப்பது எப்படி ஹராமோ அது போலவே பிறர் மானத்தை பறிப்பதும் ஹராமே கொலை செய்வதில் வேண்டுமானால் முஸ்லிம்கள் ஈடுபடாமல் இருக்கலாம். ஆனால் அவதூறு பரப்புவதிலும் பிறர் மானத்தை பறிப்பதிலும் மற்றவர்களை மிஞ்சும் வகையில் முஸ்லிம்கள் செயல்படுகின்றனர். சினிமாக்காரர்கள் போன்ற பிரபலங்களின் மீது கிளம்பும் அவதூறை விடவும் நல்ல இயக்கத்தலைவர்களின் மீதும் அப்பாவி பெண்களின் மீதும் நல்லோர்களின் மீதும் தான் அவதூறு எனும் சேற்றை அளவில்லாமல் அள்ளிவீசுகின்றனர்.

இதற்கெனவே சில முஸ்லிம்கள் இணைய தளங்களையும் ஏற்படுத்திக் கொண்டிருப்பது நம்மை ஆச்சரியத்தின் விளிம்பிற்கே கொண்டு செல்கின்றது. பிறரின் மானத்தை பறிப்பதை என்னவோ மாம்பழத்தை பறிப்பது போல நினைத்துக் கொண்டது தான் அவதூறு மலிவாகி போனதற்கு காரணமாகும். இத்தகையவர்கள் பின்வரும் நபிமொழிகளை சிந்தித்து பார்க்க வேண்டும்

யார் ஒரு முஃமினிடம் இல்லாததை கூறுவாரோ அவரை அல்லாஹ் சீலும் சலமும் உள்ள இடத்தில் தங்க வைப்பான். என்று நபிகள் நாயகம் (ஸல்) கூறினார்கள்

நூல்: அபூதாவூத்.

நான் மிஃரஜிரக்கு கொண்டு செல்லப்பட்ட போது ஒரு கூட்டத்தார்களை கடந்து சென்றேன். அவர்களுக்கு செம்பு உலோகத்தினாலான நகங்கள் இருந்தன. அதன் மூலம் தங்கள் முகங்களையும் உடம்பையும் கீறிக்கொண்டிருந்தார்கள். இவர்கள் யார் என்று ஜிப்ரீல் அவர்களிடம் வினவினேன். இவர்கள் தான் (புறம் பேசுவதின் மூலம்) மக்களின் இறைச்சியை சாப்பிட்டுக் கொண்டிருந்தார்கள். இன்னும் மக்களின் மானங்களில் விளையாடிக் கொண்டிருந்தார்கள். என்று கூறினார்

அறிவிப்பவர் அனஸ் (ரலி)

நூல் : ஆபூதாவூத்-4235

சில மக்கள் அவதூறு பரப்புவதோடு சேர்த்து கோள் மூட்டிக் கொண்டும் இருக்கின்றார்கள். ஒரு தரப்பில் பேசப்படுவதை எதிர் தரப்பில் கூறி இருவருக்கும் மத்தியில் பகைமை எனும் தீயை பற்றி எரிய வைக்கின்றார்கள். சில பெண்களிடம் மாமியாரைப்பற்றி மருமகள் குறை சொல்லியிருப்பாள்.

உடனே அப்பெண் உங்க மருமக இப்படி எல்லாம் உங்கள பற்றி சொன்னா பெருசா ஏதும் கேட்டுக்காதீங்க சும்மா தான் சொன்னேன் என பற்ற வைத்து விடுவார்கள். இது போன்ற கயவர்களுக்கு இறைவன் கடுமையான தண்டனையை கொடுப்பேன் என்று எச்சரிக்கின்றான். மேலும் இத்தகையோர் சொர்க்கம் செல்ல என்ன ஆசை கொண்டாலும் அவர்களின் ஆசை நிறைவேறாது என நபிகளார் கூறுகின்றார்கள் இறைவனின் தண்டனையிலிருந்து இவர்கள் ஒரு போதும் தப்பி விட முடியாது. 

நாங்கள் ஹுதைஃபா பின் அல்யமான் (ரலி) அவர்களுடன் இருந்தோம். அப்போது அவர்களிடம் (இங்குள்ள) ஒருவர் நமக்கிடையே நடக்கும்) உரையாடல்களை (கலீஃபா) உஸ்மான் பின் அஃப்பான் (ரலி) அவர்களிடம் போய்ச் சொல்கிறார் என்று கூறப்பட்டது அப்போது ஹுதைஃபா (ரலி) அவர்கள் கோள் சொல்கின்றவன் சொர்க்கம் செல்ல மாட்டான் என நபி (ஸல்) அவர்கள் கூற நான் கேட்டுள்ளேன் என்று சொன்னார்கள்

நூல் : புகாரி-6056

(நபியே) குறை கூறித் திரிகின்ற கோள் சொல்லி அலைகின்ற எவருக்கும் நீங்கள் இணங்கிவிடாதீர்கள்

(அல்குர்ஆன்:68:1.)